Men's Day

पुरुषांचे अश्रू दिसत नाहीत 

दबून जातात परंपरांच्या ओझ्याखाली 

"पुरुषांनी खमकं असायला हवं" - 

या आणि अशा असंख्य जोखडांखाली 

कण्हत कण्हत अखेरचा श्वास घेतात 

बर्‍याच माणूस होऊ पाहणार्‍या पुरुषांच्या संवेदना 

त्यांच्या हळुवार मनांचे दगड बनवले जातात 

पुरुषांकडूनच... कधी स्त्रियांकडूनही... 

आणि त्या दगडांना शेंदूर फासून 

घर घेऊ शकणारा 

नोकरी करू शकणारा 

अंगमेहनतीची कामं करू शकणारा 

वंशावळ पुढे चालवू शकणारा 

बाईला मुठीत ठेवू शकणारा 

मुलांवर डोळे वटारू शकणारा 

मर्द बनवलं की धन्य होतात 

पुरुषसत्ताक परंपरेच्या पालखीचे भोई 

त्यातूनही काहीजण सुटतात सहीसलामत 

स्वत:चाच मार्ग शोधत काट्याकुट्यांतून 

टोमण्यांतून खच्चीकरणातून 

माणूसपणाचा अंकुर जपत 

वटवृक्ष होऊन बहरतात 

अनेकांना सावली देतात 

कित्येकांना पंखांखाली घेतात 

अशाच पुरुषांसाठी साजरा करायचा असतो 

एक दिवस 'मेन्स डे' म्हणून 

नाहीतर इतर सगळे दिवस तसेही 

स्वत:चं पौरुष मिरवणार्‍या 

पुरुषांचेच असतात 

 संदेश कुडतरकर.