अनामिका

राहते का उभी कुणाच्या मनात माझी प्रतिमा

शेतकरी म्हटल्यावर?

होतो का माझा विचार शेतमजूर म्हटल्यावर ?

मी ही राबते शेतावर खांद्याला खांदा लावून

पाठीला मुल बांधून

मी ही राबते मजूर म्हणून दुसर्याच्या जमिनीवर

पुरुषापेक्षा कमी मजुरी घेऊन

शेती, मजुरी ह्या सार्या कल्पना

माझ्या प्रतिमेतून उभ्या रहातच नाहीत कुणाच्या मनात

माझी प्रतिमा बसून राहिली आहे परंपरांमध्ये

मी स्वत:ला पाहते पोळीत आणि भाकरीत

आरशात पाहिल्यासारखी

माझी पृथ्वी तव्या एवढी

माझे कष्ट पृथ्वी एवढे !