किरण येले

१

किरण येले 

बाई माजघरात
कापते । चिरते । किसते । तळते । शिजवते । उकडते
काही काही ;दिवसभर काम करत राहाते
चाकू, सुरे, विळे, आग, वाफेसोबत
तिला एकही इजा होत नाही

सायंकाळी
पुरुष घरी परतू लागतात
ती सावध होते.
तिला जखमा होऊ लागतात.

२
बाई बनवते वेगवेगळे पदार्थ
मुलांच्या आवडीचे
सासू - सासर्‍यांच्या आवडीचे
नवर्‍याच्या आवडीचे
नवर्‍याच्या मित्रांच्या आवडीचे
पण तुम्ही बाईला
कधी दुसर्‍यांच्या आवडीचे
पदार्थ बनवत
असतानाच्या वेळी पाहिलंय ?
तिची त्या वेळची
लगबग, हालचाल, उत्सुकता, काळजी...सगळंच ?
जाऊ द्या...
नसेल पाहिलं
कारण, तुमच्या मते
बाईनं बनवलेली गोष्ट महत्त्वाची
ती बनवतानाची तिची स्थिती बिनमहत्त्वाची
असं असू शकेल

तर
बाई बनवते
वेगवेगळे पदार्थ
मुलांच्या आवडीचे
सासू - सासर्‍यांच्या आवडीचे
नवर्‍याच्या आवडीचे
नवर्‍याच्या मित्रांच्या आवडीचे

पण
बाईला कधी तुम्ही
तिच्या आवडीचा पदार्थ
बनवताना पाहिलंय ?

सांगायची गोष्ट अशी की
रांधणारी आणि वाढणारी
ती स्वतःच असली तरी
जेवताना
बाईच्या ताटात नेहमी
दुसर्‍यांच्याच आवडीचे पदार्थ असतात.
ताटात
आणि आयुष्यातही !