भीती

हो, भीती वाटतेय मला..

बलात्कारांच्या वाढत्या घटनांची

हा आजार वाढतोय, दिवसेंदिवस..

रोज अनेक लहान थोर स्त्रियांवर बलात्कार केला जातोय..

म्हणून भीती वाटतेय मला ..

भीती तुम्हालाही वाटतेय, 

पण तुम्ही भिताय स्त्रियांसाठी व मुलींसाठी

त्यांच्या सुरक्षिततेसाठी

माझी भीती निराळी आहे

माझी भीती आहे मुलांसाठी

निरागस कोवळ्या मुलांसाठी

जी मोठी होऊन बनणार आहेत - एक पुरुष

भीती वाटतेय की

त्यांच्यातील प्रेम, निरागसता संपणार आहे..

उरणार आहे फक्त "रेप कल्चर" चा आजार..

नक्की कधी होतो हा बदल

मुलापासून पुरुष होण्याचा..

मला माहित नाही... 

थांबवता येईल का तो क्षण? 

मला माहित नाही... 

हा आजार सर्वांमध्ये आहे जे सहमत आहेत या पळवाटेशी - 

Men will be men

तुम्ही म्हणाल - "सर्वच पुरुष रेप करणार नाहीत" 

नक्कीच नाहीत ... 

किती आहेत आपल्या अवती भोवती असे " चांगले " पुरुष...

ते कसे करतील रेप ... छे!  

अगदी मान्य..

पण  हा आजार हजार प्रकारे दिसतो..

चांगले पुरुष -

विचारात, कल्पनेत, नजरेत कधी केला असला रेप - 

तरी प्रत्यक्ष नक्कीच करणार नाहीत ..

धक्का , शिट्टी, गर्दीचा फायदा नव्हे गैरफायदा हे "रेप " नाहीत  

प्रत्यक्ष घडलाच "चुकून " रेप तरी असा पाशवी नक्कीच नसणार...

अनोळखी स्त्री असेल सुरक्षित त्यांच्यापासून... नात्यातील नसल्या सुरक्षित तरी ठीकच ..

पत्नी तर हक्काची असते... तिचा नकार गुन्हा असतो..

नाही का? 

किंवा  ते स्वतः करणार नाहीत मात्र समर्थन करतील

म्हणतील, " स्त्रियांचे कमी कपडे  आणि मोकळे वागणे चुकीचे आहे - बंद करा" 

"मुलींना सांभाळून तिजोरीत ठेवा " 

कारण

"आमच्या " पासून कोणी सुरक्षित नाही..

जोवर रेप कल्चर मान्य आहे तोवर नक्कीच नाही.. .

एकच विनंती

सांभाळा, खूप सांभाळा

तुमच्या "मुलांना "

निरागस कोवळ्या मुलांना

या आजारा पासून

पुरुष बनण्यापासून

या रेप कल्चर पासून !!

ही काळाची गरज आहे !!

खूप मोठी जबाबदारी आहे...

"मुलांच्या " पालकांवर !

जगातल्या स्त्रियांना सुरक्षित ठेवण्याची.......

डॉ. प्रिया देशपांडे