या अंकाचं सूत्र ‘खाद्यसंस्कृती आणि लिंगभाव’ असं आहे.
अंकातील विविध लेखांचा आशय लक्षात घेऊन मुखपृष्ठ तयार करणं हे एक कठीण काम होतं.
अंकातल्या विविध लेखांच्या आशयाला अनुरूप अशी व्यंगचित्रं शुभा खांडेकर यांनी काढली आहेत. त्यापैकी एका व्यंगचित्राचा उपयोग करून हे मुखपृष्ठ बनवले आहे.
आजकाल वेगवेगळ्या कारणांमुळे पुरूषांचा स्वयंपाकघरातला वावर वाढला असला तरी स्वयंपाक हा अजूनही बाईचीच जबाबदारी मानली जाते. जणूकाही स्वयंपाक करण्यासाठी गर्भाशय असणे गरजेचे असते ! ह्या साचेबंद विचाराला छेद देणारे अनेक लेख या अंकात आहेत.
म्हणून गर्भाशयालाच पोळपाटावर पोळी लाटणारे दोन हात शुभाने चित्रात जोडले आहेत आणि Extended roll of the womb (Role आणि Roll शब्दांवर कोटी साधत) समर्पक शीर्षक दिलं आहे. त्यातून अंकाचा आशय चांगल्या प्रकारे व्यक्त होतो आहे. फक्त मुखपृष्ठाच्या विशिष्ट आकाराच्या रचनेत हे चित्र बसवायचे असल्यामुळे आम्हाला त्यात अॅप्रनची भर घालावी लागली. पण म्हणून चित्राचा आशय फक्त शहरी आणि उच्चभ्रू स्त्रियांच्या बाबतीतच मर्यादित आहे - असं सूचित करण्याचा अजिबात हेतू नाही, हे नमूद करावंसं वाटतं!
मुखपृष्ठा विषयीच्या आपल्या प्रतिक्रिया समजून घेण्याची उत्सुकता आहेच. जरूर कॉमेंट्स लिहा.